Home აღზრდა ბავშვებს „წუწაობის“ საშუალებაც უნდა მივცეთ და ცივი წყლითაც გავაკაჟოთ“

ბავშვებს „წუწაობის“ საშუალებაც უნდა მივცეთ და ცივი წყლითაც გავაკაჟოთ“

222
SHARE

ზაფხულში განსაკუთრებით აქტუალურია კითხვები – რამდენად მისაღებია მაცივრის წყალი ბავშვებისთვის, რეკომენდებულია თუ არა კონდიციონერი პატარებისთვის, რომელი ასაკიდან მივცეთ ბავშვებს ნაყინი, შეიძლება თუ არა თევზი ზაფხულში? – ​Moms.ge-ს კითხვებს ცნობილმა პედიატრმა, მედიცინის მეცნიერებათა დოქტორმა ინგა მამუჩიშვილმა უპასუხა.

ქალბატონო ინგა, რამდენად მისაღებია თერმოსის ან მაცივრის წყალი?

მე მომხრე ვარ, რომ ბავშვმა მიიღოს ოთახის ტემპერატურის წყალი და ასევე შეგვიძლია, მივცეთ გაყინული და შემდეგ გამდნარი წყალიც: გავყინოთ წყალი, გამოვიღოთ მაცივრიდან, გავადნოთ ოთახის ტემპერატურაზე და მივაწადოთ. დღეს ხშირია შემთხვევები, როცა მშობლები მოდიან ჩივილებით: „სუსტი ყელი აქვს ჩემს შვილს“ – არავითარ შემთხვევაში. ჩვენ უნდა დავიწყოთ ყელის გაკაჟება, ნაყინის მიცემა გარკვეული ასაკიდან (2 წლიდან), ცივი წვენის მიცემა. მშობლები ხშირად ამბობენ, რომ ბავშვი არ სვამს წყალს, კომპოტებს, არ იღებს სითხეებს. არ იღებს იმიტომ, რომ არასწორი ტემპერატურით ვაწვდით. ბავშვს გემოვნების რეცეპტორები უკვე გამომუშავებული და დახვეწილი აქვს და მას არ მოსწონს თბილი წყალი. განსაკუთრებით, ზაფხულის პერიოდში. აქვე მინდა აღვნიშნო, რომ ცოტა მოზრდილ ბავშვებს (3 წლიდან) უნდა მივცეთ „წუწაობის“ საშუალება, გავაკაჟოთ ცივი წყლით, ვაბანაოთ აუზში და ა.შ. ეს ძალიან მნიშვნელოვანია. ამგვარად, ბავშვებს 6 თვიდან გრილი წყლით სარგებლობის უფლება აქვთ.
რეკომენდებულია თუ არა კონდიციონერი და მოქმედებს თუ არა უარყოფითად ბავშვზე?

მე არ ვარ კონდიციონერის წინააღმდეგი, თუმცა არ მომწონს, როცა კონდიციონერის პირდაპირ ნაკადს ვუშვებთ ბავშვთან. უნდა დავარეგულიროთ კონდიციონერი ისე, რომ ჰაერის ზედა ფენებში მოხდეს ამ გრილი მასების გაშვება, პირდაპირ არ უნდა ხვდებოდეს ცივი ჰაერის ნაკადი ბავშვს. ასევე ძილის პროცესში ბავშვი შედარებით ოფლიაონობს, ამ დროს კონდიციონერი ნამდვილად არ შეიძლება. ღრმა ძილის პროცესში ბავშვი ვერ განსაზღვრავს სცივა თუ სცხელა. აქედან გამომდინარე, შევეცადოთ, რომ მივაჩვიოთ ბავშვი ტემპერატურულ ცვალებადობას. დავიწყოთ 30 გრადუსიდან და თანდათან, ყოველდღიურად თითო გრადუსით დავწიოთ ტემპერატურა. ზაფხულის პერიოდში ოთახის ტემპერატურა სასურველია, იყოს 20 გრადუსი. ამაზე დაბლა არ დავწიოთ.
კიდევ ერთი კითხვა, რომელსაც ხშირად სვამენ მშობლები – შეიძლება თუ არა თევზი ზაფხულში?
რა თქმა უნდა, ზაფხულშიც შეიძლება, მაგრამ, მე პირადად, ზაფხულში ბავშვისთვის თევზის მიცემას მაინც ვერიდები. თუ მაინც გვინდა, რომ მივცეთ ბავშვს თევზი, საქართველოში გვაქვს მდინარის კალმახი, რაც შეიძლება დავიწყოთ 8 თვის ასაკიდან…
ზაფხულში ზღვა თუ მთა, რომელია მეტად სასურველი?

ორივე ძალიან სასარგებლოა. მე ყოველთვის იმას ვამბობ, რომ ვერ მოვუწოდებ საზოგადოებას, მაინცდამაინც ამა და ამ კურორტზე უნდა წაიყვანოს ბავშვი, ნამდვილად არა. უბრალოდ, სასურველია თუ თბილისის დაბინძურებულ გარემოს გავარიდებთ ბავშვს და წავიყვანთ შედარებით გამწვანებულ, რეკრეაციულ ზონებში, თუნდაც სოფელში.
რამდენი დღე არის საჭირო, რომ ბავშვს ჰაერის გამოცვლაში ჩაეთვალოს?

ბავშვს სჭირდება ადაპტაციური პერიოდი წაყვანის ან თუნდაც ჩამოყვანის დროს. ამისათვის საკმარისია, არანაკლებ 14 დღე. რა თქმა უნდა, სასურველია 1 თვეც. შეძლებისდაგვარად, როგორც მოახერხებთ, სადაც მოახერხებთ, მთაც და ზღვაც, ორივე სასურველია. რა თქმა უნდა, მშვიდობიან ზაფხულს ვუსურვებ ყველას, თუმცა უმჯობესია თუ ბავშვს ცენტრალურ ქალაქებთან ახლოს გაიყვანთ დასასვენელად, რადგან საჭიროების შემთხევევაში სამედიცინო დახმარება სწრაფად აღმოუჩინონ. ეს ძალიან მნიშვნელოვანი ფაქტია. მივესალმები შერეულ ჰავას, იქ, სადაც მთაც და ზღვაც გვხდება. უბრალოდ ზღვაზე უნდა დავიცვათ ჰიგიენური ნორმები. ასევე, არ უნდა გვყავდეს ბავშვი მზეზე დიდხანს, არ უნდა გადავახუროთ, უნდა შევეცადოთ, რომ წყალში არ შევიყვანოთ ისეთ დონეზე, რომ წყალი ყლაპოს. გოგონებში ძალიან ხშირია სოკოვანი ინფექციები ზღვის შემდგომ, ამიტომ ყველანაირად უნდა დავიცვათ ეს ნორმები, უნდა შევეცადოთ ვიხმაროთ წყალგაუმტარი საცურაო კოსტიუმები და ა.შ.
წყარო: moms.ge
Banner 5

LEAVE A REPLY

Please enter your comment!
Please enter your name here